धेरै चोटि हेरें तिमीलाई धेरै चोटि देखें
बाटो छुट्टी गएकोले मन मारी बसें
पाइला मोडी तिमीबाट नभागेको होइन
तर पनि तिमीलाई किन भुल्न सकिएन
दोबाटोमा उभिएर कुर्दाकुर्दै तिमीलाई
मनमुटु एउटै पारी हेर्दाहेर्दै तिमीलाई
आँशु झारी तिमीसामु नरोएको होइन
तर पनि तिमीलाई किन भुल्न सकिएन
बतास रोकी तिमीलाई बोलाएकै थिए
तिमी हिड्ने बाटो छेकी टोलाएकै थिए
बिदाइको हात पनि नहल्लाको होइन
तर पनि तिमीलाई किन भुल्न सकिएन
खाटा बस्दै थियो घाउ किन फेरि बल्झ्यो
बिर्सुं भन्ने मायालुले किन फेरि सम्झ्यो
परेलीमा लुकाई राख्न पनि सकिएन
तर पनि तिमीलाई किन भुल्न सकिएन
मेरो मनको समुद्रमा तिम्रै यादको छल्को
जता हेर्छु उतै देख्छु तिम्रै रुपको झल्को
डोली चढाई घुम्टो ओढाई लान सकिएन
तर पनि तिमीलाई किन भुल्न सकिएन
सपनीमा आउँछौ तिमी अतित दुखाउँछौ
कल्पी कल्पी संझिएर माया बल्झाउँछौ
आँगन पोली जग्गे हाली लान सकिएन
तर पनि तिमीलाई किन भुल्न सकिएन
नजर जुधाई हेरिरहुँ लाग्छ तिमीलाई
अँगालोमा बेरिरहुँ लाग्छ तिमीलाई
सिन्दुर पोते उपहार दिन सकिएन
तर पनि तिमीलाई किन भुल्न सकिएन
राम योञ्जन
पोखरे, भोजपुर ।