सवाल-जवाफ (गजल) : माया छैन पनि भन्छौ, भए जस्तो गर्छौ किन ?

सवाल

माया छैन पनि भन्छौ, भए जस्तो गर्छौ किन ?
अर्कैसँग बोल्दा मलाई ठुला आँखा तर्छौ किन ?

तिमीजस्ती लाखौं हुन्छन् हजारको त कुरै छाड
त्यसो भन्दै तिमी आखिर मेरै रुपमा मर्छौ किन ?

मलाई पाताल तिम्लाई आकाश दाँज्दै हिड्छौ सधैंभरि
फेरि फर्की तिमी मेरै नजिक नजिक पर्छौ किन ?

खुला छोडिदिए तिम्लाई जे मन लाग्छ त्यही गर
भन्दै फेरि छाडा हुँदा मलाई आँखा घुर्छौ किन ?

मुटुभरि घाउ थुपारी मलाई हिलो बनाएसि
हिलोमा नै फुल्छ कमल सधैंभरि भन्छौ किन?

– मिथिला प्याकुरेल

जवाफ

मुखले जति भने पनि माया कहाँ टाढा हुन्छ
अर्कोसँग बोल्दा तिमी मुटु घोच्ने काँडा हुन्छ ।

सिधै माया गर्छु भन्दा आफ्नै रुप राम्रो ठान्छौ
तर अरु देखे पनि यादमा माया गाढा हुन्छ ।

पातालकै पानी मिठो आकाशको जुनभन्दा
तिमीबाट टाढा जान्न फेरि यो मन छाडा हुन्छ ।

एकछिन छाड्यो भने तिम्लाई आँखा तरी मर्छन
माया गाँस साँची बस्ने त्यो देउराली डाँडा हुन्छ ।

बनको बाघ घुर्न नपाई मनको बाघले खाएपछि
आस्थारुपी मन्दिर ढल्छ विश्वासमा बाधा हुन्छ ।

– रामकृष्ण पौडेल अनयाँस