चारौँले गुना पाइन्छन् यहाँ रमाइलो नगरकोट
विचित्रमय लाग्दछ यहीँ भेटिन्छ मदेश भोट
सूर्यले हिमाल अङ्कमाल गर्दा उझ्यालो मिर्मिरे
फट्टकि सेतो हिमाल पनि भैदिन्छ छिर्बिरे
चौतारी भञ्ज्याङ फूलबाटो थुम्का भिरालो सम्मैलो
हिमालमुनि त्यो मेरो घर त्यहीँ छन् रमाइलो
ऐँसेलु तिँदू काफल कटुस साल सिमल घरै छन्
स्वर्गझैँ लाग्ने त्यो जन्मभूमि जहाँ ती घरै छन्
हरिया चहुर ती वनवुटा साथीभाइ खेलेको
रहेछन् त्यहीँ विचित्रमय स्वर्ग नै छेलेको
रनोवन अहो ! वन र पाखा डिलैका चौतारी
अन्यत्र कतै पाइन्न कस्तै खोजेर भौँतारी
विश्वमा छायाँ पर्दछन् जब गोधूली घमाइलो
कल्याङ र कुलुङ पन्छीका बास त्यहीँ छन् रमाइलो
पहेँला बान्की घुर्मैलो रातो गोधूलि घमाइलो
त्यो ढुङ्गा माटो पातीका बोट त्यहीँ नै रमाइलो
दुराडाँडा, लमजुङ
मधुपर्क २०६७ फागुन
गोविन्द गोठाले विशेष