युद्ध र पराजय

युद्ध र पराजय

युद्ध आक्रोशका पर्याय ती हेराइ
युद्ध अतृप्तताको झल्को ती हेराइ
कुन्ठित चाहनाको आशातित हेराइ
बैरी पराजित पर्न उत्तेजित ती हेराइ
रणभूमिमा तातेका रणबीरका ती हेराइ
ती हेराइ………………..

बान्की परेका कसिएका जीउ ती
रणकौशलसँगै खारिएका बलिस्ठ पाखुरा ती
निर्णायकको खाँचो नदेख्न्ने लडाकु ती
दर्शकको औचित्य नठान्ने बलवान ती
युद्ध तिर्खाले गुम्सिएका बहादुर ती
बहादुर ती ……………..

सल्किसकेको छ युद्ध यात्रा
युद्धमा बिचरितहरूको यो नियात्रा
युद्धमा समर्पितहरूको यो जात्रा
सल्किसकेको छ युद्ध यात्रा
युद्ध यात्रा………….

चिसो सिरेटोलाई चुनौती
मल्लकालिन युद्ध
चट्याङ तुवाउने युद्ध
मन्दिरका टुंडाल बिर्साउने युद्ध
मोहको पराकास्ठा यो रसिलो युद्ध
रसिलो युद्ध……….

उन्माद सँगै तातिँदै छ युद्ध
हतियारको बर्षाइ अनि तानातानको युद्ध
सुस्केरासँगै लडिँदै छ युद्ध
आफू पराजित हुन नखोज्नेहरूको यो स्वार्थी युद्ध
यो स्वार्थी युद्ध………..

अन्तत:
लामो युद्धसँगै थाकेका
लामा-लामा सुस्केरासँगै तरंगिएका
स्खलितताको मोहमा बौलाएका
अघिसम्म पराजित हुन नखोज्ने योध्दाहरू
अचम्म, एउटा मोहको भेलसँगै
पराजय स्वीकार्छन्,
दुबै पराजित हुन्छन् ……………
पराजित हुन्छन्………………

northdj777@gmail.com
DXB